Турун пуктӧм

                                                                    Ыджыд вокӧс казьтылӧмӧн

Мунім водз на… Лӧнь да ыркыд… Сӧлім пыжӧ... Вуджим юсӧ... Ота кӧдджыс йӧв кодь еджыд… Абу руа… мый нӧ тайӧ? 
    Бус кодь лысва копыртӧма турун сіяс. Сэтшӧм уна! Засӧ эжӧмаӧсь вӧся чутъяс-мольяс… Сідзкӧ мича лоӧ луныс… Сӧстӧм  енколаӧдз сынӧд йиджтысьӧма дзоньнас ванас!.. Пидзӧсӧдз дзик ӧти здукӧн кӧтасим, а уйны-мунны колӧ дыр на…

Воим батьӧн вӧчӧм виддзӧдз... Керавлӧ быд тулыс лайков бадьсӧ... Номйыс-гебйыс сатшкысис дзик пыр жӧ!.. Абу чина восьса шыльыд ласта... 
  Шонді тэрмасьӧмӧн петіс-кайис вӧртас сайысь, югӧръяссӧ койис-резіс юяс, видзьяс пасьта. Чветъяс вылын дзирдалӧны лысва войтъяс, пӧртмасьӧны ӧта-мӧдас быттьӧ посни шонді.

Чышъянасим, мавтчим, коса босьтім... Лысва вылад ытшкынытӧ кокни…  Шойччӧм бӧрын ӧдӧс содтім...
«Чӧвлы, ӧвсьы, - вокӧй шуӧ, - жбыркнитіс со колип баддя тільӧ катшасин да быгзян турун пӧвстысь. Позйыс, тыдалӧ, сэн сылӧн, дзользьӧ-быдтӧ лэбач пиян. Нӧрӧвитлам, кольлам покос діӧн... Бордъясьӧма-сь, лэбзясны нин енкай пиян».

Колим дорсӧ, водзӧ ытшкам. Коса ныжмас – вокӧй лэчтас. Бара ытшкам, бара лэчтас. Усьӧ-водӧ тугъя пырей, шыр анькытш да бобӧнянь… Бокӧ шыбитам, эн вужъясь, чорыд пӧлян, кӧкакань!..

Лысва косьмис, турун чорзис. Шонді пӧжӧ, сынӧд пӧдтӧ. Ном пыддиыс лӧддзыс шлочкӧ зэвтӧм сӧнтӧ.

Мудзи… Эбӧс быри, лолӧй петӧ. «Шойччышт, - вокӧй шуӧ, - чайтӧ юышт... мӧтыр дасьті - бипур весьтас». Ачыс ён да, водзӧ бусйӧ-ытшкӧ… асъя жарыс пӧсьсӧ сылысь пычкӧ.  

Регыдӧн и виддзыс уси… Мед оз зэр ся… Чиркъяс, сьылӧй, шонді, косьты! Мича турун медым сюрас зорӧд чӧвтны.