Туй кузя мунігӧн кыла, рочасьӧ пиыскӧд мамыс: "Ты тай нӧ урок не сделал?..." Ачыс коми, верӧсыс коми, олӧны коми сиктын, но куимнан быдтасыскӧд мырдӧн рочасьӧны. Мыйла? Мед пӧ оз увтыртны школаас. (???) Школаын, кӧні унджыкыс на комияс... Тадз ӧмӧй вежӧрсяласны кыдъя роч ныв-пияныс да лэбзясны мукӧд комиысь вылӧджык? Ӧдвакӧ.
Коми кыв велӧдысь, туялысь, сӧвмӧдысь, чужан кывсӧ збыльысь пыдди пуктысь морт кор аддзӧ татшӧм ас кыв ӧтдортӧмсӧ: бать-мамлысь асьнысӧ скодиттӧм лэптӧмсӧ да велӧдчысьлысь веськодьлунсӧ, сылӧн ловъя вывсьыс потласьӧ сьӧлӧмыс. Кыдзи и Альберт Разинлӧн.
Пӧв-мӧд мыччӧд содта. Карын олысь олӧма ань, вичкоӧ котралысь интеллигентнӧй дама, чужӧмсӧ пытькыртӧмӧн юалӧ менсьым рочӧн: сиктад пӧ ставыс юӧны да, абу пӧ дыш сэн овнытӧ? Меся, миян сиктын оз юны. Прамӧй йӧз, уджач да вежӧра комияс олӧны, весиг локтӧмъяс пиысь унаӧн коми кыв вылӧ вуджӧны. А юысь йӧз прочентыс мый сиктын, мый карын - ӧткодь. Джӧмдіс. Сэсся шуӧ, кор пӧ карын комиӧн сёрнитӧны, ме пӧ некор ог висьтась мый ме коми, вывті пӧ грубӧй коми сёрниыс да, а гусьӧник пӧ кывзыся. А мыйла нӧ, сідзкӧ, кывзысян, мам кывйыд кӧ тэныд пон увтчӧм?... Интереснӧ, буракӧ, да кывзӧ, но ачыс оз на и вежӧрт тайӧс - КУТШӦМ ОЗЫРЛУН сылӧн эм - мӧд кыв, кодӧс тӧдӧны этшаӧн, и СІЙӦ ТӦДӦ.
Мӧдысь, сёрнитігӧн жӧ, мӧд карса нин шуӧ, вы пӧ так лабутно говорите. Меся, ті ӧмӧй коми? Повзис весиг: нет, нет, нет пӧ...
Сыктывкарса ньӧбасянінысь кӧ куш киӧн мунны кутан, вузасьысьыс вӧлисти ышнясьнысӧ дугдас да коми вылӧ вуджас: ме пӧ ӧд сиктса жӧ да коми жӧ, ньӧ-ӧ-бӧй пӧ менсьым мыйкӧ-ӧ-ӧ...
Кар джынйыс сиктысь петӧм коми йӧз, но дзебӧны мам кывнысӧ. Оз сёрнитны чужан кывнас асланыс быдтаскӧд, а сідзкӧ и вужнысӧ керыштӧны, а тайӧ пӧ, Т.Элиот серти, "впасть в беспамятство" - медся ыджыд грекыс.
Татшӧмъясыс ӧд и эскӧны Тишков псевдоученӧй коддьӧмлы, мый рочысь ӧтдор мукӧд вужвойтыр кывйыс некытчӧ ковтӧм да сӧмын крукӧдлӧ.
Но ученӧйыд унджыкыс ученӧй. Со, А.Разин удмурт кыв вӧсна олӧмсӧ сетіс. Абу, дерт, кулӧм сылӧн тайӧ, быдӧн оз вермы сотчыны лӧня да сувтсӧн - би кып (факел) моз, а сьӧлӧм пыдзыртан доя чукӧс. Чукӧс - удмуртъяслы да став мукӧд кывъя вужвойтырлы. Миянлы - чукӧс. Кӧть мед татшӧм ногӧн бӧръя би киньсьыс унджык войтырлӧн ӧзъяс чусалысь сьӧлӧмыс, воссяс синмыс да мыйкӧ мӧдас вӧчны ас кыв дорйӧм могысь. А власьт йылысь тайӧ лоӧмторйын весиг мӧвпыс абу - сы вылӧ надея важӧн бырӧма.
Сы мында нин та йылысь шуӧма. Ну абу миян коми вирын уна варгыны да чуймавнысӧ лӧдӧма. Вомад пӧ ракаыс пырас да черлыыд пӧ чеччыштас. Этшаджык больгы - унджык вӧч. Медводз - сёрнит чужан кывнад ачыд да челядьыдкӧд да эн эскы коми кыв ёрысьяслы. Тайӧ верманатор быдӧнлы, весиг ме кодь полысь кӧчлы.
Комментариев нет:
Отправить комментарий