Донтӧм донысь

    

Школаын велӧдчигӧн (сизимдасӧдъясын, помланьыс) ыджыд перемена дырйи быдлаӧ волыны удитлім.  А донтӧммӧдӧм тӧварӧн вузасьӧм йылысь тӧдмалӧм бӧрын вежон чӧж сельпо складӧ ньӧбасьны котралім.  

Мыйыс сӧмын сэн эз вӧв! Инасьтӧм шылльӧ-мылльӧыс ыджыд чукӧрӧн джодж шӧрас   и куйліс. Мый тэд колӧ – ачыд бӧрйы. Быдтор вылӧ веж петӧ. Уна и сьӧм миян - колӧкӧ, вит-дас кӧпейкаӧн морт вылӧ и эм. Кино видзӧдны. Но и та вылӧ унатор шедӧ!  

Медводз перӧа ручка ньӧби, некор на сэтшӧмсӧ эг аддзыв да. Пызанвывса ручка пуктаныскӧд. Сьӧд, югъялӧ, выль. Черниласӧ, вунӧма да, мӧд луннас босьті. Сэсся зэв шыльыд лым еджыд лист бокъяса блокнот сюри да важ пӧлӧс визя тетрадьяс.

А кутшӧмкӧ лунӧ лапкыштӧм нин кӧлуй пӧвстысь син улӧ уси кӧвйӧн зэлыда кӧрталӧм кык небӧг чукӧр. Туктӧма нин, но разьлытӧм на.  Ӧтиас - коми-роч кывкуд! Мыйла и татчӧ веськалӧма, вайигас зэр улын тшыкӧма али мый? Урок вылӧ ковмывлӧ, гортын мыйлакӧ абу, небӧг вузасянінын оз тыдав, а тані ӧтпырйӧ вит ли квайт буссьӧ-туплясьӧ.  Вылыссасӧ восьті да - шогмана на, кӧть ёна нин вижӧдӧма. 

Кысь нӧ ог босьт ӧтикӧс, нӧшта донтӧм донысь... 

Уна ва нин ньӧбӧмсяньыс кывтіс, а ӧнӧдз на тайӧ кывкуднас вӧдитча. Дерт, и роча-коминас - тшӧтш. Век мыйкӧ выльтор аслыд восьтан, вунӧмасӧ тшӧтш видзӧдлан.  Ӧтуввезйын  Fu-Lab кывчукӧрыс абу на важӧн. Майбыр, сэсь быд ногыс ӧні кывъястӧ позьӧ корсьны!  А сыӧдз меным сӧмын тайӧ "инасьтӧм тӧварыс" отсавліс.